Egun hauetan zabaldu dugun bezala, gaurko egunean KMko areto nagusian Smithsonian Institutioneko Nancy Proctor izango dugu. 19.00etan hasiko da eta bertaratu ezingo dezutenok streaming bitartez ere jarraitzeko aukera izango duzue.

Smithsonian Institutuan euskarri mugikorretara egokitutako programaren burua delarik, erakunde kulturalek gailu edo gadget elektronikoen bitartez kudeatzen dituzten edukiak erabiltzaileentzat eskuragarri jartzeko beharrezko ikerketa eta hausnarketak bideratzen ditu. Eduki kulturalen hedapena gailu elektronikoen bitartez nola bideratu daiteken jakin nahi baduzue, Nancy duzue aditua eta bereziki kudeatzen duen MuseumMobile(eng.) ataria.

Egun hauetan Euskal Herrian dugu eta atzo eta herenegun Bilbon jardunaldi batzuetan partehartzearekin batera KMra gurera ekartzeko aukera izan dugu.

Gaurko berria eta ona. OSO ona.

Mugikortasuneko eta Lurralde Antolaketako Departamentuak kudeatzen dituen B5Mko mapetan agertzen den informazio geografikoari ezartzen zaizkion erabilpen baldintzak zehazten dituen Lege Informazioa aldatu egin dute eta aldaketa interesgarriak ageri dira:

Webgunearen edukia eta Gipuzkoako Foru Aldundiari dagokion geografiaren informazioa, edonork ahal izango du erreproduzitu, atera edo berrerabili, edozein formatutan, bere osotasunean zein zatika, eta ondoren zilegi izango da modu askean erabiltzea, beti ere baldintza hauek betetzen badira:

1. Beti eta kasu guztietan, autoretza azalduko da.

2. Testuek, geografia informazioak, araudiek eta webgunean agertzen den edozein informaziok izaera informatzaile soila dute. Beraz, datuen zehaztasuna eta iraunaldia dagozkien administrazio iturri ofizialetan egiaztatu beharko dira.

3. Gipuzkoatik kanpo dauden eremuei buruzko informazio geografikoari eta webgune honetan erabiltzaileen esku jarritako hirugarrengoen datuei, argazkiei eta informazioari dagokienez, horien jabetza intelektualaren eta industrialaren eskubideak legezko jabeenak izango dira. Edonola, erabiltzaileak edukiak atzitu ahal izango ditu jabeek ezarritako baldintzetan eta erabilera zehaztapen berberetan.

4. Gipuzkoako Foru Aldundiak ez ditu bere gain hartuko erabiltzaileek edukien, zerbitzuen eta informazioaren erabileran sorturiko kalteak edota indarreko legezko xedapenen arau hausteak.

5. Gipuzkoako Foru Aldundiko Administrazioak bere buruari aitortzen dio, edozein unetan eta aurretiaz ohartarazi gabe, webgunean dagoen informazioa edo haren konfigurazio zein itxuraren aldaketak eta eguneraketak egiteko ahalmena.

6. Webgune honek inongo kontrolik gabeko kanpoko hainbat web orrialderen estekak eskaintzen ditu. Horiei buruz Gipuzkoako Foru Aldundiak ez du inongo erantzukizunik eta webgunearen erabiltzaileak, beti ere, esteka haien erabilera araudiei eutsi egin beharko die.

Guretzako berebiziko garrantzia sarrerako parrafoa eta 1. puntua dira: "Erabiltzaile hori, libre zara datu hauekin nahi duzun erabilpena egiteko"  Erabilpen baldintza bezala egiletza baino eskatzen ez denez, gure aburuz Creative Commons by baimenaz hitzegiten ari gara. Wow!

Aurrera pauso honek eragin zuzena izan dezake garatzaile eta enpresek produktu eta baliabide berriak plazaratzerako garaian, orain arte eskuratzeak zailak ziren edo ezinezkoak ziren datu eta informazio eguneratu eta "preskoak" garatzaile hauen eskuan jartzen baidira. Pauso honek ekimen eta baliabide  berrien pizgarri izango delakoan gaude.   

Amaitzeko zorionak eman nahi dizkiegu B5Meko mapak kudeatzen dituen Jose Mari Aranburu eta giza talde guztiari, ESKERRIKASKO!

Bartzelonan ospaturiko Free Culture Forum ekitalditik bueltatu ginela aste bat joan zaigularik, bertan ikusi eta bizitakoarekin zenbait hausnarketa partekatu nahiko genituzke.

Berez, FCFa lau egunetan banatu zen. Lehena osteguna 29an, Apolo Antzokian eXgaek antolaturiko oXcars2009 sarien banaketa izan zen. Ostiralean aldiz, Universitat de Barcelonako Aula Magnan partehartzaileen hitzaldietan bota genuen: goizeko 9.30etan hasi eta 20.15ak arte partehartzaile guztien ekarpenak jotafuego entzuten jardun ginen. Ostiralean entzun genituenak larunbatez eztabaidatzeari ekin zitzaion partehartzaileok taldeka banatu ginelarik eta amaitzeko igandean ikuspuntu eta testu bateratu bat adosten CCCBn.

 Larunbateko eztabaida saioa.

Kultura eta Euskara Departamentutik FCFra begirale ofizial gisa gerturatu ginelarik, KULTURAK egun bizi duen erronka anitzen artean hamaika ideia eta proposamen entzun genituen. Partehartzaileek kultur edukiak askatzeko beharra eta ezinbesteko neurritzat behin eta berriz azpimarratzen bazuten ere, galdera hori erantzuna emango dion proposamenik ez genuen entzun. Alegia, ados egon gaitezke sortzaile edo enpresa batek, bere edukiak "libreki"  banatzea ona izan daitekela kultur sorkuntza horretarako, baina sortzaileak trukean "zakarra" jaso nahi badu, zein bide egon daitezke eduki libreetatik monetizazio bat egon dadin? Gure zalantzek ez zuten erantzunik jaso.

Zenbait partehartzaileen ekarpenak interesgarriak suertatu ziren bezala, bereziki EFF eta Brasilgo Kultura Ministerioko ordezkariarenak, Suediako Pirat Partiet alderdiko Amelia Andersdotter europarlamentari berriak hotz utzi gintuen: PP Estrasburgera eraman duen programa, orain eztabaidatzeari ekin diotela ulertu genion eta PPn ideologiaz pelaje guztietako jendea dagoela agerian utzi zigun. Hala ere ber ebost minutuko solasaldiak ez zuen ezer gehiagorako eman.

Informazio osagarria nahi duenak, FCFak wiki bat ireki du eta bertan ekitaldiaren ondorioak eta eztabaida materialak zintzilikatzen hasiak dira jada. Bestalde, EuskalTubera igotako bideoan, larunbatean Hangar aretoa eta bere giroa ikusi ditzazkezue.